Beannachtaí na Féile Pádraig oraibh

An Manneken-Pis (‘an Firín Múin’) agus é feistithe amach mar Ghael inné (16 Márta), sa Bhruiséil.

Advertisements

An Club Leabhar – ‘Dé Luain’

Is é Dé Luain, le hEoghan Ó Tuairisc (Sáirséal Ó Marcaigh, 1998, 224 lch) an leabhar is deireanaí atá roghnaithe ag an gClub Leabhar.

Seo thíos sliocht as Vicipéid ina thaobh:

Sa bhliain 1966 a tháinig an dara húrscéal stairiúil le hEoghan Ó Tuairisc i gcló – Dé Luain. Bhí Éirí Amach na Cásca á cheiliúradh sa bhliain chéanna, ó d’imigh leathchéad bliain i ndiaidh na n-imeachtaí. Bhí Ó Tuairisc meáite ar “leac chuimhneacháin” a thógáil do lucht an Éirí Amach, ach san am chéanna bhí sé ag iarraidh úrscéal uaillmhianach nua-aimseartha a chumadh, agus chuaigh sé i dtuilleamaí na teicníochta insinte is mó a shamhlaítear le James Joyce, is é sin, sruth an chomhfheasa. Bhí a lán réamhthaighde agus mioneolais de dhíth leis an leabhar a ullmhú. (Léigh leat….)

Dé Luain

An Club Leabhar – Ár meas ar ‘Iognáid Loyola’

🙂 I réamhrá an leabhair seo, deir Seán Ó Tuama: “De na scríbhneoirí próis ar fad a bhí ag saothrú na Gaeilge ó bhlianta an chogaidh anuas, ba é Donncha Ó Céileachair ba nádúrtha éirim, dar liom. Níl aon ábhar gur dhírigh sé a pheann air nár chuir sé a anam ann. Fear litríochta ó thalamh ab ea é.” Ba dheacair ag éinne a bhfuil Iognáid Loyola léite aige gan a bheith ar aon fhocal leis an Tuamach. Seoid de leabhar an leabhar seo; ní hamháin go bhfuil an t-ábhar suimiúil – beathaisnéis Iognáid Loyola, bunaitheoir Chumann Íosa agus duine de mhórphearsa na staire – ach tá an insint thar barr ar fad, fosta. Aon duine ar cuid dá ghairm bheatha dea-scríobh agus ceartúsáid na Gaeilge (aistritheoir, scríbhneoir, múinteoir, iriseoir), ba cheart dó Iognáid Loyola a léamh go grinn nó is eiseamláir den dá rud sin é.

Teastaíonn níos mó leabhar den sórt seo sa Ghaeilge, .i. leabhair neamhfhicsin dea-scríofa a bhaineann leis an saol mór lasmuigh d’Éirinn.